兵多将广主场赢到尽
今晚德甲压轴尾场，「1哥」拜仁慕尼黑喺主场出战弱旅杜塞尔多夫。拜仁啱啱周中赢完「国家打吡」，夺冠机会高唱入云，今仗必定乘胜追击强攻对手，不过杜塞尔多夫为抢分护级唔会缩，焗住放手一搏，加上近5次联赛交锋，4次总入球达5球或以上，4.5球嘅入球大乃不二之选。
（无綫85台、Now 670、有线651及611台周日凌晨零时30分直播）
拜仁慕尼黑喺啱啱周中快车嘅「国家打吡」，虽然两大「Goal手」罗拔利云度夫斯基同汤马士梅拿食白果，一样凭住甘美治妙绝笠射，作客以1比0击败劲敌多蒙特，并且甩开「蜜蜂兵团」7分，为联赛8连霸赢得极为关键一仗。查实拜仁气势如虹，近14场联赛取得13胜1和，合共轰入46球，其中9场总入球达4球或以上。当中主场出击经常大炒客军，包括以6比1狂数云达不来梅、以5比0大胜史浩克04，上周末又赢法兰克福5比2，可见拜仁喺主场要赢到尽，而中途接手嘅主帅汉斯弗利克，各项赛事带队24仗豪取21捷，胜率高达88%，係队史中领军胜率最高嘅教头。
杜塞尔多夫护级冇得缩
另一边厢，尾3嘅杜塞尔多夫现时只落后尾4嘅缅恩斯1分，护级仲未绝望，今季联赛只剩低6轮，为抢分要焗住要主攻，最佳例子係早前作客科隆，佢哋踢得坚进取，一度领先两粒，点知防线甩辘，喺最后3分钟连失两粒，畀对手逼和2比2，上仗更勇挫史浩克04，但咁嘅豆腐防线，点顶得住有射手罗拔利云度夫斯基助阵嘅拜仁来袭呀？
翻查纪录，杜塞尔多夫近5次联赛对住拜仁入6粒，今场就算输波，都应该有力破蛋，加上5场交手中有4次总入球达5球或以上，随时再演入球骚，4.5球嘅大盘咪错过。
