两度易帅布拉加随时走晒样

布拉加虽然从未染指葡超冠军，不过佢哋对上5季联赛都能打入前5名，其中4次获得殿军，可以讲係传统Big3以外、近年成绩最稳定嘅球队，升格为Big4之一绝对有根据。布拉加今季开咧不顺，头14场联赛仅获5胜3和6负，首季执教嘅沙宾度歇冬前落镬，改由鲁宾艾摩廉接手

呢位曾经代表葡萄牙出战2010、2014两届世盃决赛周嘅35岁少帅，成功带领布拉加翻生，唔单只喺联赛领军9战8胜1和，1月底嘅葡联盃决赛更以1比0力挫波图捧盃，赢得今季首项锦标，鲁宾艾摩廉嘅出色领导才能吸引到另一支褪色劲旅士砵亭注意，3月初被后者高价挖角，布拉加逼于无奈要一季内两度易帅，由另一位毫无执教经验嘅前国脚古斯杜迪奥（圆图）接手。虽然布拉加于联赛停摆前以4分领先士砵亭排第3位，不过余下球季将有鲁宾艾摩廉掉转枪头，话唔定联赛排名会出现大逆转。