各位读者好耐冇见，讲波前先讲吓历史，公元1347年，一场瘟疫「黑死病」笼罩整个欧洲，死亡数字以千万计，打击甚大，成为中世纪欧洲文艺复兴嘅导火线，令文化、工业等大大兴起。从上年开始，突如其来嘅新冠肺炎疫情蔓延全球，感染死亡人数比「黑死病」严重得多，亦影响各项体育活动，连欧国盃、美洲盃及东京奥运都要延期1年。
面对呢场世纪战「疫」，大家都需要谂计拆解，好似香港赛马会，虽然照样保持每周两个赛马日，但唔准马迷入场，并且关闭所有投注站，只能睇住电视直播，透过网上投注，既可减低因人群聚集而令病毒传播，同时尽量减低损失，抵讚！
我不得不佩服以纪律见称嘅德国，经过多月停摆后，德甲喺上月中正式重赛，係欧洲4大联赛中首个重开嘅联赛，西甲喺上周中亦复赛，而意甲、英超都快将重开，无论作为球迷、球员、球队班主，甚至当地政府都係乐见，因为足球已非单纯只係比赛，亦贯穿商业、旅游、税收等等，之前一下子全部停摆，影响犹如骨牌效应。
经历如此重创后，点样先可以重新振兴球坛呢？我认为一众高薪球星应该壮士断臂，透过减薪帮球队度过难关，咁样可为复兴踏出重要一步，呢招绝非空口讲白话。讲番足球，虽然利物浦与拜仁喺所属联赛夺冠几无悬念，但西甲「皇巴」之争，以及意甲嘅祖记与拉素仍咬得好紧，总算为球迷喺炎炎夏日带嚟惊喜。文:黄兴桂
