行運撞正私房菜
今晚西甲壓軸尾場，皇家馬德里喺B隊主場迪史堤芬奴球場迎戰馬略卡。「銀河艦隊」重登榜首之餘，王牌夏薩特同箭頭賓施馬愈嚟愈夾，火力全開，撞正「私房菜」馬略卡必趁熱食，讓兩球唔怕辣，照捧讓球主勝。
（Now 632周四凌晨4時直播）
夏薩特有起色
自從聯賽重開後，皇馬3戰贏晒，未計周中賽事已登上榜首，而且好運到冇朋友，好似上仗贏皇蘇2比1場波，皇蘇翼鋒贊奴沙遠射破網，雖然隊友米基爾馬連奴喺越位位置，但佢冇掂到個波，不過球證認為米基爾馬連奴阻住皇馬門將泰拔高圖爾斯嘅視線，判入球無效，頗具爭議，皇馬認真行運。
此外今季一直飽受傷患困擾嘅夏薩特，經聯賽停擺可專心養傷後，表現有起色，早前連續兩場交出助攻，上場列作後備明顯留力搏今場。儘管有隊長沙治奧拉莫斯上陣成疑，但賓施馬連續兩仗有士哥夠生猛，有佢配合「夏神」火力全開。依家皇馬重掌爭標主動權，戰意爆燈，唔炒多幾球都唔會收手。
馬略卡喺下游掙扎，重開後3戰1和2負狀態亦曳，呢支小島球隊最大問題係作客腳軟，今季14場聯賽作客只得1勝2和11負，加上馬略卡做慣皇馬「私房菜」，雙方近4次交手，馬略卡有3次至少輸3粒，今場都係等劏格，讓球主勝有買趁早。
