今晚英超頭場之一，般尼主場迎戰「大黃蜂」屈福特。般尼上仗慘敗收場，而且射手基斯活特仍未好番，今仗一定穩陣行先，「大黃蜂」要搶分護級，客場唔敢亂嚟，加上兩軍碰頭勁旺半場和，值得再追。
（Now 622周五凌晨1時直播）
英超停擺3個多月，各隊難免狀態未起，般尼亦唔例外，重開首仗即慘吞曼城5蛋，尤其失咗第1球後即崩潰，全無還手之力。除此之外，兩大前鋒基斯活特同艾殊利班尼斯仲未好番，佢哋今季聯賽合共入咗17粒，齊齊缺陣攻擊力受削弱，連後衞羅比巴迪都傷埋，吸取上仗慘敗教訓，今仗一定先做好防守。
近4次交手全開半和
屈福特上仗對李斯特城打得唔錯，雖然完場前失守，但佢哋喺補時靠後衞奇治戴臣靚波追和，執番身彩。佢哋依家仲喺護級漩渦，仍需努力搶分，特別係對住般尼呢類同級對手，點都要有分落袋，加上快翼迪路菲奧重傷長抖影響攻力，客場出擊更加唔敢輕舉妄動。
翻查紀錄，兩軍近4次交手全開半場和，其中3次半場波膽為0比0，可見雙方初段都係先求穩陣，謀定而後動，預計今仗初段都係拉鋸局面，半場和更值得捧場。
