今晚西甲獨腳戲，西維爾主場迎戰華拉度列。西維爾連續3場聯賽失分，狀態麻麻；華拉度列客場最叻玩拉布，相信初段會陷於膠着，不妨向半場和埋手。
（Now 632周六凌晨4時直播）
西維爾雖於聯賽重開後首仗擊敗貝迪斯，可惜之後3場全部打和，賽程頻密下球員狀態難以維持，如果唔係基達菲唔爭氣頻頻失分，西維爾隨時已跌出前4。
華拉度列精於拉布
另一邊廂，華拉度列亦要搶分護級，不過佢哋鋒力疲弱，今季31場聯賽入得26粒，惟有先做好防守。聯賽重開4仗，華拉度列取得1勝2和1負，包括1球僅負馬體會，近3場全開2球或以下，證明喺防守下過苦功。加上佢哋近6場聯賽作客，有5次半場同對手踢成0比0，證明初段頂得住，今仗半場和值追。
