英足盃8強豪門混鬥
今晚英格蘭足總盃上演3場8強激戰！李斯特城同車路士兩支聯賽前4勁旅正面交鋒，睇頭十足；曼城聯賽失冠後匆匆上陣，巧遇紐卡素；阿仙奴上仗反彈，自然想趁錫菲聯勢頹乘勝追擊，各支豪門為晉級冇得保留！
今晚最強戲碼李斯特城主場迎戰車路士。「狐狸」聯賽表現回落，目前矛頭指向足總盃，佢哋喺快車賽程比車路士多兩日休息，體力有優勢，連盃賽在內，「狐狸」近6次對車仔法定時間獲1勝5和，主場仲有得受讓，讓球主勝抵玩。（周日晚11時開賽）
李斯特城及車路士同處聯賽前4位置，同下面幾隊有啲距離，暫時可分心盃賽。「狐狸」復賽後兩場聯賽分別打和屈福特同白禮頓，畀人感覺勒住勒住咁，唔似停擺前踢得咁放，似乎係領隊羅渣士嘅策略，希望球隊慢慢入局，今場足總盃8強鬥車仔先見真章。
李斯特城眾將踢完兩場復賽後，顯然操起咗狀態，尤其英格蘭國腳芝維爾，呢位翼衞能攻擅守，盛傳成為車仔收購目標，今場肯定會大演身價。上仗對白禮頓勇救12碼嘅門將卡斯柏舒米高，穩定演出予人信心，盃賽場合擁有穩健門將，對一隊波非常重要。
林柏特或作輪換
車路士領隊林柏特喺英足盃會派部分副選上陣，如柏度洛迪古斯、葛特蘇馬及韋利卡巴尼路等，雖然目前已經去到8強階段，但由於佢哋上周中先同曼城激戰完，比李斯特城少2日休息，今場或要作出更多輪換。雙方近6次對賽，車仔法定時間內從未贏過，只得5和1負，唔好因為贏到曼城就將佢哋睇得太高，今場作客讓波掂唔過，寧捧「狐狸」讓球主勝。
