爭標直路1分不能少
西甲上演「首尾之戰」，包尾嘅愛斯賓奴主場硬撼豪門皇家馬德里。愛斯賓奴連輸2場，可見佢哋想護級都有心無力，反觀皇馬全力爭冠，西甲重開後4戰全勝，走勢銳不可當，預料上半場就有力攻陷愛斯賓奴，直取半場客勝。（Now 632周一凌晨4時直播）
皇馬自復賽後連場報捷，包括擊敗2支前列強隊華倫西亞及皇家蘇斯達，可見「銀河艦隊」整體狀態相當不俗。賽程頻密之下，皇馬主帥施丹輪換得宜，除咗莫迪歷、夏薩特等主力唔需要全勤，可以輪休之外，洛迪高高斯、雲尼斯奧斯祖利亞等新人出場亦交到貨，有效減低球員體能消耗，所以球隊每場都可以保持水準。未計昨晚賽事，皇馬同巴塞同分，為爭標1分都不能少，今場勢必先發制人，盡快奠定勝局。
武球王嘥料打擊信心
愛斯賓奴喺復賽首場擊敗艾拉維斯之後，表現無以為繼，包括打和基達菲、不敵利雲特及貝迪斯，前鋒武磊上場更加浪費1次入波黃金機會，隨時打擊信心，更加難同皇馬抗衡。特別係愛斯賓奴主場表現不濟，今季聯賽15次於地頭出擊，只獲2勝5和8負，比客場得分更少之餘，亦係聯賽主場成績最差球隊，表現令人失望。
睇番雙方近9次聯賽碰頭，皇馬不但取得8勝，而且8次都喺上半場領先，可見其閃擊戰奏效，捧半場客勝之餘，半全場「客客」亦可留意。
