西甲今晚上演獨腳戲，基達菲主場火併皇家蘇斯達。雙方原本係爭前4嘅勁敵，點知復賽後齊齊跌Watt，逐漸被甩開，加上人腳唔齊，相信都會穩陣行先，基達菲喺自己地頭最叻玩拉布，經常開半場和，值得再追。
（Now 632周二凌晨4時直播）
皇家蘇斯達愈踢愈沉
雙方原本氣勢唔錯，一度係爭前4嘅熱門分子，估唔到聯賽突然停擺打窒咗道氣，同樣喺重開後4戰未贏過，不過皇蘇仲衰，當中輸咗3場，包括不敵艾拉維斯同切爾達，停擺前好弗嘅馬田奧迪加特、阿歷山大伊沙克等冇晒料到，令人失望。除此之外，中場核心伊拿拉文迪喺前仗輸畀皇馬，賽後喺球員通道侮辱球證，被罰停賽2場，要坐埋今仗先「放監」，同時後衞迪亞高洛蘭迪亦要停賽，真係屋漏偏逢連夜雨。
基達菲亦唔好得幾多，復賽後4仗只得3和1負，入得3粒咁大把，攻力堅疲弱，除咗伊迪保及艾歷卡巴高未好番之外，達高南亦要坐波監，人腳不整，加上佢哋向來重視防守，依家狀態麻麻之下，更會穩陣行先。呢班波擅於玩拉布，近6次聯賽主場出擊，竟有5次開半場和，當中有4次半場波膽開0比0，可見佢哋初段零舍保守，遇上同樣死晒火嘅皇蘇，半場和不妨追多鋪。
