挑戰多項紀錄唔揸流攤
英超今晚上演褪色「藍紅大戰」，曼城主場迎戰利物浦。「紅軍」提早奪得英超冠軍，不過仍希望挑戰最高得分紀錄，亦唔想一攞冠軍就喺死敵面前失威；「藍月亮」輸咗個聯賽冠軍，主場出擊都想贏波挽回面子，今場牙骹戰依然矚目，加上雙方聯賽交手都多入波，一於捧中位數2.5球入球大。（Now 621及611周五凌晨3時15分直播）
利物浦提早7輪贏得英超錦標，好多球迷都對佢哋嚟緊嘅作戰心態抱有疑問，查實「紅軍」仲有多個紀錄等住破，包括英超單季最多勝仗（32場）、最高得分（100分），同埋冠亞軍最大分差（19分），咁蹺3個紀錄都係由曼城擁有，如果利物浦今場贏到，亦保持機會追平「藍月亮」創下嘅最多作客勝仗（16場）紀錄，鬥心唔會減弱。
翻查英超近季冠軍球隊紀錄，除舊年曼城同利物浦要鬥到最後一輪先分出勝負，對上3季英超盟主提早奪冠後，都冇放軟手腳。2017/18年曼城提早5輪奪冠，翌仗大勝史雲斯5比0；2016/17年車路士提早兩輪捧盃，跟住險勝屈福特4比3；至於2015/16年李斯特城提早2輪封王後，一樣輕取愛華頓3比1，冠軍球隊一向唔揸流攤，「紅軍」自然唔會做衰仔。
曼城主場誓挽面子
主場嘅曼城聯賽冠軍已經輸咗畀利物浦，依家人哋嚟踩場，都想攞番個彩。雖然主帥哥迪奧拿話會按照傳統，要求球員列隊拍掌歡迎冠軍隊入場，但落到場就另一回事，實行同佢死過。既然雙方過去5次喺聯賽交手，4次總入球達3球或以上，今場相信都會係一場入球騷，與其估勝負，倒不如轉捧入球大更穩陣。
