火力超猛勒唔住
意甲前列大戰，阿特蘭大主場對拿玻里。阿特蘭大係今季意甲鋒力最強球隊，28戰合共轟入80球，但失球亦偏多，導致近6場賽事總入球都係5球或以上，極為誇張，對家拿玻里亦係進攻型球隊，預料今場兩軍大駁火，中位數3.5球嘅入球大值得捧場。（myTV Super 301、Now 638及有線654、614、662、602台周五凌晨1時30分直播）
拿玻里當弗唔怕鬥攻
阿特蘭大近年喺加斯柏連尼執教下大踢進攻足球，即使取得領先優勢，都仍然繼續喪攻，所以經常製造出大比數賽果，其中主場對烏甸尼斯、作客對拖連奴及萊切，都攻入對手7球，鋒力勁到癲。意甲復賽後，阿特蘭大仍然維持有前無後嘅踢法，主場對第2位嘅拉素，更加係喺落後2球之下反勝「藍鷹」3比2，上場作客亦以同樣比數擊敗烏甸尼斯。包括聯賽及歐聯在內，阿特蘭大已經取得8連勝，近6場賽事總入球都達5球或以上，弗到冇朋友，今場又有地利之助，應該會繼續強攻對手。
另邊廂，拿玻里雖然爭前4位機會渺茫，但班波近排走勢強勁，捧意盃之餘，近5場聯賽亦贏晒。「進攻鐵三角」米利克、梅頓斯、恩斯治尼今季合共轟入22個聯賽入球，有本錢同阿特蘭大周旋到底。事實上，拿玻里近4次作客阿特蘭大，就有3次贏波，今場梗係唔怕鬥攻，今場個入球大怕且都走唔甩。
