作客遇強馬略卡必死守
今晚西甲獨腳戲，3哥馬德里體育會主場迎戰馬略卡。馬體會上仗惡鬥巴塞搏得好盡，未回得切氣，而且每逢主場遇死守球隊，初段總係老鼠拉龜冇碇埋手，半場和不妨追多鋪。
（Now 632周六凌晨4時直播）
前鋒表現不穩難破密集
馬體會雖有後衞史提芬沙域及中場佐治高基刑滿復出，但佢哋喺周中聯賽同巴塞隆拿激戰一場，喺兩度落後下，憑沙奧尼古斯兩番操刀12碼得手，最終逼和2比2，今季聯賽打和次數多達14仗，創下隊史喺單季西甲最多和波紀錄，耗力甚巨未及回氣。
況且「床單兵團」每逢主場出擊，大部分客軍都會擺鐵桶陣，前鋒祖奧菲歷斯及艾華路莫拉達又表現堅飄忽，初段仲係陷於苦戰，雖然近4場聯賽主場獲3勝1和，不過全開半場和，而且可見佢哋初段冇乜計破密集，要喺易邊後先搵到對方破綻。
仍喺下游掙扎嘅馬略卡，上仗意外地大勝切爾達5比1，「日本美斯」久保建英更交出2次助攻，以19歲零26日之齡，成為本世紀西甲最年輕單場交出兩次助攻嘅外援。不過佢哋係正宗客場蟲，今季16場聯賽作客13度落敗，實力曳爆，作客強敵必定玩死守。近5次造訪馬體會，亦有4次開半場和，相信初段會處於膠着，寧捧半場和。
