C朗當弗殺得性起
今輪意甲重頭戲，AC米蘭主場迎戰祖雲達斯。榜首嘅祖記全力衝冠，重開後近4場全勝，走勢強勁，王牌球員C朗更連續有士哥，即使主力保羅戴巴拿同馬菲斯迪歷特停賽，憑其雄厚陣容力足殺敗表現時好時壞嘅AC米蘭，客W值得跟進。
（myTV Gold 301台、Now 638、有線654、614、662及602台周三凌晨3時45分直播）
作為意甲傳統勁旅，AC米蘭近年表現「唔上唔落」，佢哋喺聯賽重開後首2場贏波，但之後作客護級份子史帕爾，要對手打少個兼擺烏龍先賽和2比2，上場作客2哥拉素，反而大勝3比0，水準相當反覆。雖然AC射手伊巴謙莫域已復出，但呢位「神鋒」始終年事已高，匆匆再戰未必回得切氣，即使主場出擊亦不宜高估。
戴巴拿迪歷特停賽未驚過
另邊廂，祖雲達斯就醒神得多，踏入季尾愈戰愈勇，王牌C朗頻頻有士哥，繼早前對熱拿亞射入時速達105公里世界波後，呢位葡萄牙球星上場又入靚罰球，亦係佢相隔394日之後再憑罰球直射破網，助祖記以4比1輕取拖連奴，狀態番晒嚟。雖然兩大主力保羅戴巴拿同馬菲斯迪歷特累積夠5面黃牌，今場要停賽，但本身祖雲達斯陣容球星如雲，冇咗保羅戴巴拿，用同C朗「夾慣夾熟」嘅希古恩效果一樣靠得住。
事實上，祖雲達斯近年喺意甲橫行霸道，實力超晒班，翻查往績，祖雲達斯過去6次聯賽對AC米蘭全勝，包括近2次作客AC米蘭都贏2比0，可見兩隊級數有明顯距離，今場一定捧祖記客勝。
