英超得番4輪，今晚兩仗頭場都係上演護級大戰，其中諾域治主場硬撼韋斯咸，堅係生死鬥。「金絲雀」依家包尾形勢最危，若果贏唔到就救唔番，決心必大；韋斯咸臨近季尾明顯回勇，2.5球嘅入球大值博。
（Now 621及611周六晚7時30分直播）
諾域治依家只得21分包緊尾，落後「安全區」尾4嘅屈福特同韋斯咸10分，如果今仗贏唔到，又或者另一邊廂屈福特贏波，「金絲雀」就提早3輪宣布降班，非常被動，依家惟有望贏番場，咁先有一線生機。韋斯咸仍未上岸一樣要搏，好彩佢哋狀態唔錯，米查利安東尼奧及湯馬士蘇錫克近3仗都有2球進帳，不過佢哋連續14仗聯賽有失波，玩大盤更好路。
屈福特誓捉風流喜鵲
同時間開波嘅另一場護級關鍵戰，屈福特主場對紐卡素。屈福特上仗「6分波」以2比1勇挫諾域治，前鋒韋碧克以一個靚絕倒掛打破入球荒，重拾信心，若果今仗贏埋，唔單止可以將諾域治踢落英冠，亦會甩開尾3般尼茅夫6分，對護級大有幫助。「喜鵲」紐卡素冇嘢好爭，日前吞曼城5蛋明顯等放假，加上近4次造訪「大黃蜂」錄3敗，主勝必捧。
（ViuTV 99台及Now 622周六晚7時30分直播）
