歐聯及歐霸8月復賽，香港時間今晚6點同7點進行抽籤，所有賽事改踢單場淘汰制，歐聯賽事安排在葡萄牙里斯本舉行，歐霸盃就搬去德國4個地方完賽。
歐聯8強定於8月12日開賽，23日進行決賽，賽事搬去葡萄牙里斯本舉行，至於停擺前尚未完成嘅4場16強次回合賽事，曼城對皇馬、拜仁對車路士、祖記對里昂及巴塞對拿坡里就定於8月7日復賽，歐洲足協尚未決定比賽地點，消息指如有關球隊未能於主場作賽，將移師葡萄牙另外2個城市波爾圖及吉馬朗伊斯舉行。
至於歐霸盃僅完成6場16強首回合賽事，次回合比賽地點未定，但西維爾對羅馬、國際米蘭對基達菲甚至連首回合都未踢，呢2場將會改為一場過，比賽地點未定。8強至決賽亦將改為單淘汰制，喺德國4個地方，包括科隆、杜伊斯堡、杜塞爾多夫及蓋爾森基興完成，決賽喺科隆舉行。
