力保前4 火力全開
今晚英超重頭戲車路士作客錫菲聯，曼聯來勢洶洶，「藍戰士」為保住歐聯入場券火力全開，連同停擺前賽事，近8場聯賽豪取6勝1和1負，每場最少轟入2球，8場總入球都達3球或以上，今晚作客照搶可也，中位數2.5球大盤值捧。
（Now 621周日凌晨零時30分直播）
車路士今季可以長期穩佔前4位置，領隊林柏特知人善用功勞最大，季初喺冇增兵嘅情況下，重用一班年輕小將刮起青春風暴，雖然季中一度陷入低潮，但經調整後，仍然堅守前4位置。
車仔喺比賽停擺期間成功留住幾名老將，韋利安同柏度洛迪古斯效力到今季結束，基奧特則續約1年，正因為韋利安同基奧特腳風大順頻頻入波，配合狀態火熱嘅「美國隊長」基斯甸普列錫，車仔近8場聯賽錄得6勝1和1負不俗戰績，合共轟入20球，火力全開，證明「林伯」確係有料到。
錫菲聯唔會求守
錫菲聯暫排第7位，仍有機會爭奪歐洲賽入場券，主場出擊當然唔會刻意求守，佢哋復賽後首兩場主場賽事都係面對倫敦球隊，分別喺英足盃1比2見負阿仙奴，以及聯賽3比1擊敗熱刺，兩場總入球都多於3球，今晚面對另一倫敦球會車路士，入球騷相信走唔甩，捧2.5球入球大。
