周日晚英超早場，狼隊主場迎戰愛華頓，力爭歐聯入場券嘅狼隊，周中作客以0比1不敵錫菲聯後，挑戰前4嘅形勢被動，必須盡力搶得1分得1分。狼隊今季爭勝本錢係超強防守，近6場聯賽全部開細盤，今場對「拖肥糖」相信會繼續穩中求勝策略，捧中位數2.5球嘅入球細。（Now 621周日晚7時直播）
葡萄牙領隊紐奴功力深厚，陣中「葡萄牙幫」同其他球員相處融洽，將戰術發揮得淋漓盡致，都係狼隊今季喺聯賽及歐霸雙線發展都取得好成績嘅原因。佢哋復賽後首3場全勝，對阿仙奴一役因對手有超水準發揮見負，輸波情有可原，上場作客錫菲聯，亦戰至補時階段先至慘遭對手絕殺。
近6仗4次保清白身
整體而言，狼隊近6場聯賽4次保持清白之身，總入球全開2球或以下，今晚返主場相信會踢得更加小心翼翼，以穩守突擊克敵制勝。
愛華頓復賽後5場聯賽取得2勝2和1負，成績尚可，惟場上表現亦比較慢熱，只有巴西前鋒李察利臣較為搶鏡。主帥安察洛堤喺作客情況下，戰術往往會較為保守，今場未必會同狼隊有大手交易，入球細好路。
