護級6分波搶得就搶
今晚英超獨腳戲爆發護級關鍵戰，「錘仔幫」韋斯咸主場硬撼「大黃蜂」屈福特。依家兩軍同分排下游，仲未擺脫降班漩渦，不過「錘仔幫」主帥莫耶斯不愧為護級專家，臨近季尾撳掣瘋狂搶分，米查利安東尼奧大爆發佢應記一功，屈福特每逢作客例必腳軟，生死關頭寧願信「莫天才」，上盤有計。
（Now 621周六凌晨3時直播）
雖然以31分排聯賽尾3嘅般尼茅夫喺周中以1比2不敵曼城，不過同得34分嘅韋斯咸及屈福特仍未解除降班威脅，為護級喺呢場「6分波」戰意唔使懷疑。
以波論波，韋斯咸班底確實唔錯，你可以笑主帥莫耶斯唔識帶豪門爭標，當年喺執掌曼聯搞到一鑊泡，但佢曾帶領愛華頓同韋斯咸成功護級，經驗豐富。韋斯咸近4仗聯賽取得2勝1和1負，狂搶7分，包括爆冷擊敗車路士，上仗對諾域治更狂派4蛋，前鋒米查利安東尼奧食出大四喜添，「莫天才」將呢位過去多打翼鋒嘅英格蘭球員轉型前鋒，即喺近4場轟6粒，收到奇效，成為「錘仔幫」瘋狂搶分嘅最大功臣。至於中場就由「老黃忠」麥克盧保帶住4件後生仔，活力十足，其中右翼查洛保雲自冬季轉會窗來投後愈踢愈有，處理角球亦有一手，成就韋斯咸季尾爆發嘅另一個關鍵。
屈福特作客唔識入波
另一邊廂，屈福特雖然連贏2場，但要留意全屬主場賽事，兼且上仗梅開二度嘅隊長迪尼，今仗因傷上陣成疑，連同長抖嘅迪路菲奧，火力進一步受削弱，何況「大黃蜂」一向客場發揮堅差，近4場聯賽作客輸晒之餘，仲1粒都入唔到，真係見到都唔開胃。加上近4次交手，韋斯咸獲3勝明顯格食格，佢哋為盡快上岸必藉地利爭勝，讓平半上盤值得捧場。
