意甲重頭戲，羅馬主場迎戰國際米蘭，羅馬爭入前4位機會渺茫，戰意成疑。反觀國際米蘭趁列強失分，重燃爭標希望，現時只係落後榜首祖雲達斯6分，餘下5輪聯賽必定搏盡爭勝，希望創造後上奪冠奇迹，加上射手阿歷斯山齊士近期大翻身，國米鋒力十足，小讓平半要上盤。（Now 638、有線654、614、662、602台及myTV Gold 301周一凌晨3時45分直播）
相比祖雲達斯同拉素近期頻頻失分，國米狀態明顯較佳，取得2連勝，合共攻入7球，最令人驚喜係長期表現低迷嘅前鋒阿歷斯山齊士（Ａ山）都大翻身。呢位智利國腳上場聯賽頂入1球及1次助攻，協助國米大勝史帕爾4比0。
唔經唔覺，Ａ山喺意甲復賽後，已經創造8個入球，包括射入2球及6次助攻，僅次於同期創造9個入球嘅祖記巨星Ｃ朗。Ａ山狀態回勇之下，即使國米首席射手盧卡古受肌肉傷患困擾，攻力仍然有保證。
羅馬前4不保鬥心成疑
至於羅馬已經落後第4位拉素12分，打入前4位機會名存實亡，雖然近3場全勝，但對手都係弱隊，不宜作準。事實上，羅馬早前對ＡＣ米蘭、拿玻里都輸波，今場面對來勢洶洶嘅國際米蘭，更加凶多吉少。
