為護級戰意高昂
今晚係西甲煞科日，全部10場同日打晒，而焦點竟然落喺一場強弱懸殊之戰，由尾3嘅雷加利斯主場迎戰1哥皇馬。雷加利斯季尾開行Turbo搶分，依家只落後切爾達1分，護級仍未絕望，但非勝不可之下冇得死守，皇馬啱啱重奪聯賽冠軍，稍有鬆懈放水唔奇，仲要讓波信唔過，寧捧讓球主勝。（Now 632及611周一凌晨3時直播）
正所謂季尾波，戰意大過天，雷加利斯就係最佳例子，主帥艾古爾一向老謀深算，於季尾瘋狂發力，近8仗聯賽取得3勝3和2負，狂搶12分，單計近4仗取得3勝1和兼冇失波，包括擊敗畢爾包同華倫西亞，仲要喺陣中首席射手洛迪古斯阿尼斯缺陣大部分賽事下取得，難能可貴，同時亦反映出一人肯走多步，願望就有機會達到。雷加利斯依家排緊尾3，落後「安全線」切爾達1分，由於對賽成績輸晒，就算同分都會係切爾達護級成功，因此雷加利斯今仗非勝不可，仲要望切爾達失分，雖然形勢略為被動，但預計佢哋會先做好本分，再期待奇迹出現。
皇馬提早封王必心散
皇馬於啱啱周中擊敗維拉利爾，提早1輪封王，唔單止係佢哋第34次勇奪西甲冠軍，亦係自2016至17年度球季後再次捧盃，尤其係把握巴塞自亂陣腳下奪冠，值得開心，但眾將難免仍沉醉於喜悅中，唔好期望佢哋搏甩髀，隨時派副選出戰。睇番雙方近3次碰頭，雷加利斯只曾1敗，加上「銀河艦隊」心都散晒，雷加利斯可趁機偷雞，主場受讓必捧讓球主勝。
