今晚英超尾場重頭戲，熱刺主場鬥李斯特城。熱刺復賽後4場聯賽主場3勝1和，演出有保證；「狐狸」李斯特城仍要力爭歐聯入場券，餘下2輪已冇失分空間，兩軍近6次聯賽交鋒合力炮製28個士哥，5次總入球開3球或以上，首選中位數2.5球大盤。
（Viu 99、Now 621及611周日晚11時直播）
熱刺自從由摩連奴接手後，整體表現雖未致於脫胎換骨，但總算站穩中上游位置，而且單計主場成績其實唔曳；喺摩帥帶領下，熱刺12場聯賽主場獲8勝1和3負，當中復賽後4場3勝1和，包括上場喺北倫敦打吡反勝死敵阿仙奴2比1，賽後摩帥揚言有信心可搶得下屆歐霸入場券，足見佢哋目前士氣高昂，尤其熱刺上周中作客以3比1擊敗紐卡素，射手哈利卡尼梅開二度，同連續2場有士哥嘅孫興民火力全開，為達成目標必全力搶攻。
聯賽交手勁旺入波
李城復賽後表現下滑，而且連同停擺前聯賽，佢哋近7場聯賽作客未贏過，當中只有1場冇失波，想喺熱刺身上搶走3分唔容易。不過由於「狐狸」煞科日要硬撼前4競爭對手之一曼聯，因此今場一旦失分，爭前4形勢必然處於被動，故此已別無選擇，誓必主動出擊爭勝。李城近6次聯賽對熱刺有5次開3球或以上，既然兩軍都要爭踢歐洲賽，大有機會再次合演入球騷。
