今晚意甲焦點戰，2哥國際米蘭主場迎戰「紫百合」費倫天拿。國米近期表現回勇，先後擊敗拖連奴、史帕爾及賽和羅馬，火力全開，盧卡古再破入球紀錄，加上主場慣性速食「紫百合」，直取半場主勝。（myTV Gold 301、Now 638、有線654及614台周四凌晨3時45分直播）
國米近期火力全開，得分點分布甚廣，例如對拖連奴及史帕爾嘅7個入球之中，分別由7位球員射入，包括一直備受批評嘅「A山」阿歷斯山齊士，都喺對史帕爾一役頂入1球及貢獻1次助攻，佢復賽後交出7次助攻，愈踢愈有信心。隨住「A山」弗番，令國米鋒線正選競爭加劇，即使盧卡古及拿達路馬天尼斯都唔敢偷懶，好似上仗作客羅馬，盧卡古後備落場末段射入12碼扳平，亦係佢今季聯賽第21個士哥，其中13球來自客場，令佢成為首位喺意甲首季作客攻入13粒嘅球員，非常爭氣。
紫百合遇強即謝
另一邊廂，費倫今季大部分時間喺聯賽榜中下游浮沉，由於護級壓力唔大，搶分決心唔及力爭亞軍嘅國米。事實上，費倫今季聯賽經常遇強腳軟，包括作客輸畀祖雲達斯、拉素，甚至喺主場亦輸畀羅馬、阿特蘭大及拿玻里3支強隊。加上國米近4次主場對「紫百合」贏晒之餘，全部都半場領先，半場主勝有買趁早。
