另一場意甲，拉素主場迎戰卡利亞里；聯賽重開之後，拉素成績急插水，近5場更加未贏過，皆因防線不穩，即使射手恩莫比尼大勇，但前面入埋都唔夠後面輸，既然拉素近5次對卡利亞里總入球都達3球或以上，寧願博中位數2.5球嘅入球大好過。（myTV Gold 301、Now 638、有線654、614、662及602台周五凌晨3時45分直播）
恩莫比尼爭做神射手
拉素喺意甲復賽之後8場比賽，僅錄2勝1和5負，上場以1比2不敵榜首祖雲達斯，由爭冠軍到依家淪落到排第4位，落後祖記達11分。呢支首都球隊近期表現往往虎頭蛇尾，包括對阿特蘭大、萊切、薩斯索羅，都係領先之下倒輸收場，足見防線班球員精神唔夠集中。
不過，拉素鋒線上仍然有大將恩莫比尼擔大旗，呢位意大利國腳現時有30球進帳，同祖雲達斯球星C朗並列射手榜一哥，無論為球隊成績或者為自己爭取神射手殊榮，今場都要搏命數胡。
至於排聯賽第11位嘅卡利亞里已經冇護級壓力，今場可以放開懷抱盡情踢風流波，雖然佢哋近4次對拉素未威過，慘錄1和3負不濟戰績，但係卡利亞里每場都取得入球。更何況拉素近期防守欠佳，卡利亞里入波機會更加高，今場最好揀入球大。
