意甲周六賽事，護級分子熱拿亞主場迎戰前列勁旅國際米蘭。今戰雙方實力懸殊，國米連續兩場聯賽失分谷埋一肚火，對住近3次對賽均大勝嘅熱拿亞有力重敲勝鼓，國米讓半一捧上盤。
（myTV Gold 301、Now 638、有線654及614台周日凌晨1時30分直播）
熱拿亞現排聯賽第17位，領先尾3嘅萊切4分，未來3仗仲要搶分護級，熱拿亞主場兩連勝，但對手只係史帕爾及萊切2支弱旅，反而之前2仗主場鬥祖雲達斯及拿玻里全部輸晒，實力上同前列球隊有一定距離，由於佢哋踢完今場之後，最後兩輪對手只係無欲無求嘅薩斯索羅及維羅納，相對地較易搶分，考慮到意甲復賽賽程頻密，平均3日踢1場，既然對手實力高自己一班，倒不如留力搏跟手兩場仲划算。
盧卡古專恰弱隊
國米近2場聯賽先後打和羅馬及費倫天拿，其中上場對費倫天拿，盧卡古及阿歷斯山齊士先後攻門中柱，和波欠運，幸好盧卡古素有「弱隊殺手」稱號，季初首循環對熱拿亞，就憑「渣古」兩度攻破熱拿亞大門，主場大勝4比0，連該仗在內，國米近3次對熱拿亞共派13隻光蛋，呢場隨時再演大屠殺，國米讓半一必捧上盤。
