阿聯搶分爭入季後賽
周六澳職頭場賽事，威靈頓鳳凰會喺新南威爾斯西澳銀行體育場火併阿德萊德聯。兩軍復賽後都有水準演出，而且近年交手互有勝負，名副其實係場五五波，考慮到雙方近5次交鋒有4次總入球開3球或以上，呢場捧中位數2.5球大盤最穩陣。
（myTV Gold 302、Now 639、有線655及615台周六下午3時直播）
來自新西蘭嘅鳳凰今次復賽冇咗主場之利，首戰作客以1比3不敵FC悉尼，不過上場轉戰今場比賽場地新南威爾斯西澳銀行體育場，即以2比1勇挫珀斯光輝，相信球員已適應比賽場地，有望比對手更快入局、更早取得士哥。
鳳凰失地利未驚過
更重要嘅係，鳳凰目前比2哥墨爾本城少1分，今場贏波便可升上聯賽榜次席，儘管中場添派尼同奧利華沙爾停賽，仍有十足戰意搶分。
阿德萊德聯現排第6位，比第7位嘅紐卡素噴射機多2分，仍未穩奪季後賽資格，需要積極搶分求勝，「阿聯」上場憑挪威箭頭基斯甸奧薛夫早段入波，1比0小勝布里斯班獅吼，狀態不俗；「阿聯」近5次聯賽對鳳凰取得3勝1和1負，往績稍微佔上風，不過除咗上季次循環踢成0比0之外，其餘4次交鋒彼此俱能在對手身上取得入球，4次總入球皆開3球或以上，今場形勢均等勝負難料，轉捧入球大更划算。
