贏波隨時袋多半億獎金
英超煞科護級區大混戰，賽前排尾3嘅屈福特要作客阿仙奴。「兵工廠」上周中聯賽0比1不敵維拉後，已無緣前7位，不過殺咗入英足盃決賽嘅阿仙奴仍想用贏波壯行色，而且呢場波關乎530萬鎊（約5,254萬港元）獎金，阿仙奴唔會嫌錢腥，遇上立立亂嘅屈福特有望早開紀錄贏到尾，半場主勝值博。（Now 624周日晚11時直播）
阿仙奴依家已經跌咗落英超第10位，雖然想透過聯賽出戰下屆歐洲賽已經冇可能，但今場絕對唔係風流波，因為英超設有獎金制度，聯賽排名每高1位就多265萬鎊（約2,621萬港元）獎金，以目前情況嚟睇，「兵工廠」仍然有機會殺上第8位，即係贏今晚呢場煞科戰，就有可能賺多530萬鎊，試問點會放軟手腳？領隊阿迪達推崇前場逼搶戰術愈見成效，佢哋往往將對手逼到犯錯頻頻，近3仗聯賽主場都喺上半場領先，強如利物浦都要上半場連失2球，顯示出阿仙奴呢種壓逼性踢法厲害之處。唔只咁，「兵工廠」前鋒奧巴美揚喺射手榜僅落後領先嘅占美華迪3球，要爭做英超神射手未絕望，對住大開大合嘅屈福特隨時一開波就爭取數胡機會。
大黃蜂易帥谷唔起
屈福特上場賽前解僱領隊皮雅臣，畀普羅球迷鬧爆喺生死關頭做最錯誤決定，最終慘吞曼城4蛋，並且因為得失球差唔及同分嘅維拉，跌落聯賽尾3。雖然護級心切，但係屈福特季尾易帥只係進一步打擊士氣，換帥後首場慘敗證明球員已經「谷唔起」，隊長前鋒迪尼狀態麻麻，加上「大黃蜂」作客成績極差，近5場聯賽有4仗上半場已落後，今場為護級形勢上焗攻，恐怕令後防暴露出更多漏洞，一於捧阿仙奴半場勝。
