今午澳職有場榜尾對決，由尾2嘅墨爾本勝利喺中立場對墊底嘅中岸水手。兩隊已經無緣晉級季後賽放鬆晒，近年碰頭又例演入球騷，寧捧2.5球嘅大盤。（myTV Gold 302、Now 639、有線655及615台周一下午5時30分直播）
近5交鋒炮製25個士哥
今仗係篤定包尾嘅水手煞科戰，既然贏輸都冇任何影響，今仗純粹睇吓邊隊想攞番個尾彩。貴為上季常規賽季軍，勝利今季長時間喺下游徘徊，而復賽後亦連輸2場，早前因有射手托禾倫同賀蘭離隊，就提升咗艾朗安達臣、西川聰等5名青年軍上一隊，雖然上仗僅輸畀獅吼，但幾位生牯仔都幾搏命，相信今場唔會hea踢。
水手連續3季都包尾收場，不過要留意，佢哋復賽後3戰獲2和1負，包括接連打和紐卡素噴射機同西悉尼流浪者，證明呢班友都有羞恥之心，今仗仲要係煞科戰，相信都想好好睇睇。翻查紀錄，雙方近5次正面交鋒，合共炮製25個士哥，全部都開3球或以上，包括今年年頭中岸爆冷贏3比2，今場隨時又大駁火，2.5球嘅入球大更值得捧場。
