今晚歐霸盃16強另一焦點戲，國際米蘭喺德國中立場硬撼基達菲。國米征戰頻仍有疲態，基達菲亦狀態麻麻，加上今場係一場過淘汰賽，稍一不慎即被踢出局，為免過早失球陷於被動，相信兩隊會踢得更加保守，預計初段會陷於拉鋸狀態，半場和值得一試。
（Now 644、有線661及601台周四凌晨3時直播）
搏完煞科戰腳軟
由於意甲復賽後需要一周雙賽，連同意盃在內，國米自6月中起已出賽14場，包括啱啱喺煞科戰以2比0擊敗阿特蘭大，保住聯賽亞軍，收咧4日即刻要應付今仗，難怪主帥干地大吐苦水，話出戰歐聯嘅意甲球隊比佢哋有更多休息時間。為免眾將搏到乾塘，干地近期無奈要加強輪換，季中重點收購嘅基斯甸艾歷臣仍未融入球隊，佢同雙箭頭盧卡古及拿達路馬天尼斯未擦出火花，加上眾將未回氣，隨時喺初段拖慢比賽節奏。
相反，西甲已收咧兩周，基達菲可養精蓄銳備戰今場。不過，基達菲狀態平平，復賽後11場僅獲1勝，除咗有9場開半場和之外，更有6場食白果，明顯兩大前鋒謝美馬達及安祖路爾斯均腳風欠順，令攻力大削，惟有先求穩陣。翻查紀錄，基達菲近5場歐霸有4次開半場和，踢法以穩陣行先，半場和值得再追。
