利華對親意甲兵腳軟
今晚另一場歐霸8強大戰，國際米蘭喺德國中立場火併利華古遜。國米主帥干地為增加話事權，對歐霸冠軍志在必得；利華今仗有中場艾蘭古斯坐波監，加上對親意甲兵都冇運行，國米少讓平半，上盤好路。
（Now 644、有線661及601台周二凌晨3時直播）
國米主帥干地早前鬧爆高層冇保護球員，一度惹來離隊傳聞，但熟佢嘅球迷都知，干地係一位唔肯認輸嘅教頭，而且國米喺佢麾下明顯進步緊，又點會執靚隊波先嚟放棄？查實佢想加強喺球隊嘅影響力，最直接係拎到佳績，若果贏得歐霸錦標，話事權自然更大，所以鬥心必堅。
國米上周憑盧卡古先開紀錄，喺16強以2比0淘汰基達菲，呢位「新魔獸」聯同拍檔拿達路馬天尼斯，各項賽事共入49球，屬8強入面最強組合，比起曼聯嘅拉舒福特拍安東尼馬迪爾（45球）更厲害，鋒力唔講得笑。
夏維斯心繫轉會
德甲代表利華古遜喺16強兩回合贏格拉斯哥流浪4比1，但盛傳佢哋踢完歐霸，就會放夏維斯畀車路士，呢位王牌隨時驚受傷影響轉會，唔慌去盡，另一中場艾蘭古斯亦要停賽。何況佢哋向來驚意甲兵，近3次喺歐洲賽對意甲球隊全敗，國米小讓平半，上盤抵玩。
