勢劏寧斯谷士氣
狀態大勇嘅曼聯，喺歐霸盃16強次回合主場迎戰寧斯。曼聯首回合作客領先5比0，明顯超晒班，雖然晉級機會濃，領隊蘇斯克查為保持球隊狀態及士氣，相信唔會放軟手腳，即使用副選都會搏盡，加上球隊近3次主場出戰歐霸盃均贏對手3球或以上，讓球半/兩球嘅上盤放心捧場。
（myTV Gold 303、Now 643、有線656及616台周四凌晨3時直播）
曼聯喺復賽之後，各項比賽11戰錄得6勝4和1負，攞到歐聯入場券，依家專心爭歐霸，相信會嚴陣以待，佢哋首回合以大比數領先，相信領隊蘇斯克查會畀部分副選落場，但主力仍然會喺下半場上陣，輕舒腳頭保持狀態，因為踢完今仗，幾日後就要出戰8強，始終保持球隊士氣同爭勝心，對繼續晉級有好大幫助。
近3次歐霸主場坐底贏3粒
奧地利新貴寧斯停擺前喺奧甲領導群雄，不過休戰期間，球隊安排一大班球員一齊操練，違反抗疫規定畀聯賽會扣分，影響備戰士氣，復賽後進行嘅10場爭標組賽事，佢哋只得3勝1和6負，球隊表現大幅下滑，尤其最後3場全部輸晒，聯賽最終只得第4，士氣跌到落谷底。
曼聯出戰歐霸實力超班，近10仗有8場能夠保持清白之身，加上近3次主場出戰歐霸，均能大勝對手3球或以上，即使出部分副選球員都唔怕，一嚟二線球員嘅實力仍然喺寧斯之上，二嚟曼聯下季有得踢歐聯，有更多本錢增兵，後備球員唔想畀人打入冷宮，有機會都要盡顯身價，一定唔會Hea踢，相信對住首回合落後0比5、無心戀戰嘅寧斯，同樣可以大勝壯聲威，讓球半/兩球唔怕多，照捧上盤。
