澳職周四下午續演獨腳戲，紐卡素噴射機喺中立場新南威爾斯鬥威靈頓鳳凰；噴射機雖已緣盡季後賽，不過臨近季尾狀態冇走樣，相反鳳凰穩奪季後賽資格後，戰績大跌，擺明留力季後賽，鳳凰復賽後5場聯賽僅1勝，今場讓平半，必捧噴射機下盤。（myTV Gold 302、Now 639、有線655及615台周四下午5時30分直播）
今場係紐卡素噴射機常規賽煞科戰，佢哋依家落後第6位嘅西部聯5分，肯定無法打入前6進身季後賽，不過佢哋復賽後3場2勝1和，包括2比1擊敗榜首FC悉尼，狀態唔錯，而且自從威爾斯籍教頭卡爾羅賓遜喺2月接掌帥印後，球隊10場聯賽取得6勝3和1負，如非季初失分太多，應有資格打入季後賽，既然呢場係今季最後一場比賽，相信球員唔會放軟手腳，希望以贏波謝幕。
連場失分鬥心成疑
威靈頓鳳凰現時落後2哥墨爾本城3分，得失球差以2球落後，數字上仲有機會爭常規賽亞軍，直入季後賽4強，不過佢哋復賽後5場聯賽僅1勝，對住下游球隊西悉尼流浪者都輸0比1，狀態、鬥心存疑，隨時留力季後賽搏殺都唔奇，鳳凰讓平半唔值博，一於要下盤。
