瑞典超周中快車，諾高平主場迎戰哈馬比。瑞典超近期賽程頻密，各隊表現難免有起伏，無法保持穩定，但留意對賽往績，發現諾高平主場長期食住對手，今仗諾高平主場對私房菜，主勝可以睇高一線。（無綫85台周五凌晨1時直播）
諾高平係2015年瑞典超冠軍，近年聯賽成績亦佔據前列位置，雖然上季跌出爭標行列僅排第5，但佢哋今季發憤圖強，開季豪取4連勝先聲奪人，其中主場表現特別出色，今季7戰錄得5勝2和不敗佳績，包括大勝上季冠軍佐加頓斯3比0。諾高平近期連輸2場都係作客，今仗終於回師主場出擊，自然令捧場客信心大增。
哈馬比作客腳軟
哈馬比近年實力增強成為爭標分子，上季聯賽排名第3，距離冠軍只有1分之遙，亦係上季入球最多球隊，合共攻入75球，不過佢哋嘅失球數字亦係前列各隊之冠，共失38球。今季哈馬比表現回落，特別係作客防線表現極為欠缺穩陣，7場作客全部有失球，今場想保清白之身都好難。睇埋對賽成績，原來哈馬比聯賽近6次作客對諾高平，僅得1和5負，明顯畀對手食住，今仗主勝值得捧場。
