聯賽8連勝火力冠日職
今日下午日職連場激戰，打頭陣有北海道札幌岡薩多主場惡鬥榜首川崎前鋒。日職復賽後，川崎前鋒豪取8連勝勁弗，相反岡薩多演出飄忽，即使有地利都幫唔到好多，寧買當頭起，客勝有買趁早。
（香港開電視77台、有線661及601台周六下午1時直播）
川崎復賽後8場聯賽贏晒，走勢凌厲，無論實力或戰意皆處托弗狀態，上輪靠三笘薰和李安度達美奧上半場各省1粒，輕鬆2比0贏大分三神，並喺聯賽榜拋離2哥大阪飛腳6分，穩居榜首。除咗李安度達美奧同小林悠兩位主力箭頭頻頻士哥外，場上進攻板斧亦多，令對手防不勝防，佢哋今季已轟入23球，係聯賽火力最強之師。
安特衛普斟介鈴木武藏
岡薩多前鋒鈴木武藏近日傳出被比甲球會安特衛普睇中，球會方面前晚承認確有此事，但係轉會談判仍在進行中，所以佢今場會繼續披甲。鈴木武藏上場聯賽傷愈復出，隨即搵到入波，可惜岡薩多仍輸畀弱旅清水心跳1比3，聯賽慘吞兩連敗，而且近5仗聯賽只得1勝，贏嗰場對手只係今季大跌Watt嘅橫濱水手。況且岡薩多呢5場比賽共失10粒，後防頗鬆散，正宗攻不銳、守不穩。睇番對賽往績，兩軍近5次聯賽交手，前鋒取得4勝1和未輸過，擺明格食格，挾住聯賽8連勝之勢，有力再下一城，客勝有計。【华体网波经频道】
