足总盃唔搏就四大皆空
英格兰足总盃16强重赛，衞冕嘅阿仙奴作客英冠球队侯城，「兵工厂」近期恶战连场，喺北伦敦打吡以2:2逼和热刺后，英超争标机会已愈嚟愈细，欧联对住巴塞隆拿亦死咗九成，所以足总盃已变成阿仙奴最大捧盃希望，对住实力低一班嘅「老虎」侯城，绝对唔会脚软，一于撑2.9倍「让球客胜」。
（开赛时间：周三凌晨3:00）
阿仙奴向来喺足总盃派副选上阵，不过球队依家受伤兵同状态影响，正副选已经大执位，上场联赛做咗后备嘅基奥特同禾确特等球星，今场好大机会披甲上阵，中场高基连停赛，亦有表现讨好嘅埃及新兵艾利尼顶上，加上祖尔甘保等前锋每次上阵都交足货，战斗力依然高过主队。阿仙奴领队云格喺球队逼和热刺后亦坦白话，球迷嘅期望为佢带嚟沉重压力，试问佢又点会唔落柯打，争番隻盃向粉丝交代？
心繫升班 侯城随时又留力
主队侯城其实最大目标係重返英超，上次作客阿仙奴佢哋一样收起9名正选，只係「兵工厂」把握唔到机会先搞到要重赛，但亦证明侯城本身亦冇争胜决心，今场输波出局一啲都唔出奇。
