尹戈尔例啅不死鸟
欧洲版「双红会」今晚强势爆发！向来被忽视嘅欧霸盃，今届16强有多场瞩目戏码，今晚首回合重头戏非英超「双红」首次喺欧洲碰头莫属。利物浦今晚喺晏菲路主场迎战曼联，两队今季联赛演出麻麻，不过「红魔鬼」近期状态明显较好，加上自领队尹戈尔上任后，将「红军」呢隻「不死鸟」玩弄于股掌之中，5次对垒全数胜出，今仗可博3.85倍客胜！
（now670周五凌晨4:05直播）
曼联近期踢得几醒神，上场联赛虽然输咗畀西布朗，不过呢场波桑马达晨早被逐，输波实在有啲冇运，反而之前喺足总盃、欧霸盃同英超拎到4连胜，可以话係今季曼联最光辉嘅时间。「红魔鬼」几名小将虎虎生威，其中拉舒福特、连格、古利姆华利拿都成功上位，配合高质素嘅迪比同安东尼马迪尔，论活力同侵略性都够晒保证。
5次对红军全部赢晒
尹戈尔虽然被唔少曼联球迷视为「衰神」，但对利物浦球迷嚟讲就係最大「剋星」！原来尹戈尔执教曼联之后，5次对住利物浦都赢波，包括今年1月作客晏菲路赢1:0。曼联今场仲话会派白色波衫畀球迷，用白色力量对抗「红军」球迷声势，班「红魔鬼」梗係要打好波报答粉丝啦！
利物浦踢惯海鲜波，上场联赛赢水晶宫亦赢得冇说服力，上圈对住奥格斯堡两回合都唔见得有优势，最后只靠1个12码淘汰对手，所以今仗表现好难有保证。虽然自高普执教鞭后，「红军」面对劲旅往往有唔错嘅演出，但每次斗剋星曼联硬係冇晒办法，今场捧客胜合理。
