适逢创会20周年，北海道札幌冈萨多今季决心冲日职，今日佢哋响日乙主场迎战FC爱媛，更加搞咗唔少庆祝活动吸客，但係爱媛呢季防守力提升，札幌亦都连续8年主场揭幕战未Ｗ过，都係小注博吓个1.82倍半场和阵啲。
（开赛时间：周日中午12:00）
3月份嘅札幌仲係好冻，今日有雨夹雪，温度介乎摄氏3度至零下3度，咁嘅环境一般嚟讲对客队唔着数，不过札幌今场连呢样主场之利都冇埋喎，事关场波安排喺札幌Dome呢个室内场上演，爱媛班人冇变雪条嘅危险，札幌惟有靠自己嘅实力同班球迷打气争呢3分。查实札幌嘅主场优势真係冇乜，佢哋自从2007年主场揭幕战1:0赢过鸟栖，跟手8年都冇法子喺自己地头打响头炮，今次係9连不胜定终于破咒，已经成为日本媒体嘅话题。
假如由人脚名气去讲，札幌起码高爱媛半班，上场佢哋大炒FC岐阜4蛋，前锋都仓贤大演帽子戏法，更加畀人一种全队开始上力嘅感觉。但係札幌其实伤兵唔少，中场大脑小野伸二左边臀部拉伤肌肉，今日唔出得，另一件前日本国脚稻本润一亦可能倦勤，就得件北海道土产中场石井谦伍刚啱伤愈，严格嚟讲中场线都未算夫添。
连和清水同山形 爱媛防衞指数升
更重要嘅係，札幌件锋将都仓贤虽然够弗，可惜佢上季个好拍档拿沙列已经约满离队，今季换咗个巴西兵雷斯（Jonathan Reis）做Partner，呢条友係有啲来头，曾经去荷兰踢过PSV燕豪芬同维迪斯，不过衰在係个搅屎棍，曾经试过食禁药、醉驾……，26岁就响欧洲立足唔到，返到巴西亦只能够喺省联盃搵食，应该叻极有限，而且佢上场有份落场，但同队友夹得唔顺，冇默契可言，今晚遇到防衞指数上升、开季接连逼和上季日职分子清水同山形嘅爱媛，相信好难有突破性演出，札幌想旨意佢同都仓贤闪电攻陷爱媛唔易，都係博半和保险啲。
