數今夏最矚目轉會，非C朗拿度過檔祖雲達斯莫屬！呢位放緊假兼訪華掘金嘅巨星，並冇跟祖記去美國踢國際冠軍盃（ICC），聽朝皇家馬德里同祖記喺ICC相逢，C朗唔會倒戈上陣，如果想睇佢鬥番舊主皇馬嘅話，可能要寄望兩隊新季喺歐聯碰頭先有機會嘞！
（奇妙電視77台、有線602及662台周日早上6時直播）
祖記後防齊腳守得穩
過去兩場ICC，祖記喺缺少文迪蘇傑、保羅戴巴拿及古達度等核心球員下，前線僅派出小將上場，表現尚算唔錯，當中費華利就極之搶鏡，加上中後場仍有基亞連尼、馬治斯奧同比真歷等老大哥壓陣，就算「保住後方」嘅保方離隊轉投巴黎聖日耳門，「老婦人」近兩場ICC以「守得穩」嘅姿態，獲1勝1和不敗成績。
「銀河艦隊」皇馬今季陣容都幾令人擔心，相信新帥洛佩特吉點去保持王朝都要動動腦筋！除咗失去C朗，原有「BBC」組合另外兩人加里夫巴利及賓施馬，熱身賽所見狀態飄忽，加上後防沙治奧拉莫斯同馬些路都年過30，係時候要搵吓適合接班人選喎。
睇番皇馬上場ICC對曼聯嘅表現，可以用「力不從心」嚟形容，最傷係把握力欠奉，就算落後之後一直壓住對方嚟踢，控球、射門次數等都佔優，但始終扭轉唔到輸波厄運。今仗面對整體表現更加穩定嘅祖記，相信皇馬食悶棍機會都幾大。
