謝拉特帶兵穩字訣
今晚歐霸盃第2圈外圍賽次回合，較矚目之戰必屬格拉斯哥流浪主場對奧斯積克。「格流」由「神奇隊長」謝拉特執教之後，經常踢穩陣波，加上有首回合1球領先優勢，今仗返主場真係你急佢唔急，一於捧入球細。
（周五凌晨2時45分開賽）
有「神奇隊長」之稱嘅利物浦名宿謝拉特，今夏接手蘇超沒落豪門格流，正式展開佢執教一隊嘅生涯，雖然「謝老四」喺球員時代偏重進攻，遠射腳腳七注，但自從執起教鞭後，一改以往敢於冒險嘅作風，經常踢穩陣波，連同首回合作客小勝奧斯積克1比0在內，近3仗歐霸錄得2勝1和，其中上圈首回合主場輕取舒古比2比0後，次回合只顧守住優勢，最終互交白卷，咁啱得咁蹺，呢3仗全開2球或以下，睇得出「謝老四」求穩風格。
奧斯積克雙箭有傷
奧斯積克雖為克羅地亞「2哥」，但首回合有地利亦久攻不下，加上今仗有前鋒加斯達及加比積波班因傷上陣成疑，想反撲亦有心無力。格流今仗唔輸就可出線，「謝老四」梗係先做好防守，睇定嚟食，入球細有計。
般尼做鴨巴甸「細」界
另一場值得留意嘅，係般尼主場對鴨巴甸，首回合打和1比1，由於般尼兩名門將尼克普比及湯希頓仲養緊傷，今仗改由前曼聯門將連迪加特把關，而且有1個作客入球在手，今仗打和0比0都可晉級，預計會踢得更保守，鴨巴甸質素所限，唔慌多波入，捧細更佳。
