雲格時代告終，改由艾美利新帥上任。新人事、新作風，當然期望阿仙奴喺人腳、排陣以至戰術風格都會有新嘅變更。明白現階段全隊上上下下都好需要重新適應同磨合，我呢個「小廠迷」唔貪心架，今季攞番個歐聯資格我都心滿意足喇！
睇咗幾場國冠盃，阿仙奴表現確係比想像中好，上場更以5比1大勝巴黎聖日耳門。令人興奮嘅係：似乎發掘到明日之星喎，就係中場球員史密夫路維！呢位啱啱過咗18歲生日嘅「小鮮肉」，喺對馬德里體育會嗰場入咗球靚波，最重要係佢有擺脫對方守將嘅嗰份膽識。佢身為「兵工廠」青訓產品，又係英格蘭小國腳，吃香就梗架喇，但即使之前被熱刺同車路士挖角，佢都堅持繼續做「槍手」，呢一片忠心真係冧死「廠迷」啦！今晚深夜阿仙奴對住車路士，唔知史密夫路維仲有冇份拍住其他老大哥，一齊炮製更多靚波呢？
車路士不論喺之前熱身賽對珀斯光輝，定係上星期六對國際米蘭，睇得出教練沙利喺球隊領先一球之後拖慢節奏，試吓唔同戰術，唔知有冇預示新球季嘅作戰風格？不過，話晒呢場面對嘅係老對手，上年季前熱身賽車仔都製造咗3個入球大炒阿仙奴，話唔定今場比之前踢得更放，大踢進攻足球架。
（奇妙電視77台、有線602及662台周四凌晨3時直播）
