天殘地缺Vs初到貴境
聽朝國冠盃美國站爆發重頭戲，由「紅魔」曼聯硬撼「銀河艦隊」皇馬。曼聯今夏季前賽表現曳爆，包括上仗「雙紅會」慘敗收場，搞到主帥莫連奴冇晒飛士，今仗倒戈皇馬更加唔衰得，以佢保守到暈嘅風格，一定會穩陣行先，今仗係「銀河艦隊」季前賽首騷，一班大帝啱啱歸隊飛到美國未入局，捧半場和最為上算。
（有線662及602台周三早上8時直播）
今夏遠赴美國備戰新季嘅曼聯，陣容真係天殘地缺，包括比利時箭頭盧卡古、中場費蘭尼、英格蘭小將拉舒福特及法國世盃冠軍成員保羅普巴等一眾主力，因世盃戰至最後階段，依家仲放緊假未報到，連同部分受傷球員，總共有17人缺席季前訓練，實力嚴重受削。就算有隨隊嘅阿歷斯山齊士、桑馬達等，同樣未操弗狀態，今夏喺美國踢咗4場熱身賽，法定時間僅得3和1負未贏過，入得3粒咁大把，前線熄晒火，而日前國冠盃更以1比4慘敗畀死敵利物浦，狀態曳冇朋友。
寸王倒戈驚衰以穩為先
雖然話季前賽輸贏都無關痛癢，但曼聯主帥「寸王」莫連奴最要面，今仗仲要倒戈舊東家皇馬，如果再輸真係失禮死人，以佢一向咁保守嘅性格，必定會先做好防守，近4仗全開半場和，有辦你睇。
皇馬今夏有王牌C朗高價轉投祖雲達斯，但未有作出其他重磅收購，今仗係佢哋季前賽首騷，睇番其美國之旅嘅名單，雖然沙治奧拉莫斯、卻奧斯、艾斯高、馬高阿辛斯奧等多名世盃國腳榜上有名，但佢哋啱啱歸隊唔慌會好弗。皇馬新帥洛佩特吉於一片爭議聲中上任，相信呢位前西班牙國家隊領隊，仍需要時間摸熟眾將踢法，加上尋日突然刮起狂風暴雨，搞到皇馬要搬到室內操練，更難提升狀態，遇上先求穩陣的曼聯，半場和值得追多鋪。
