社區盾今晚開波，意味英超球季又返嚟，今屆戲碼係由上屆英超冠軍曼城對上屆足總盃冠軍車路士。雖然近年呢項賽事魅力大減，但車仔有新帥沙利上任，定必想贏波省招牌，車路士受讓半一，下盤要捧。
（周日晚10時開賽、馬會網上文字直播）
大家對呢位前拿玻里主帥沙利嘅印象可能只係「煙剷」，但其實佢係一位戰術大師，單係死球戰術，就有38款唔同套路喺手，而且過往喺拿玻里同安玻里亦展示出悅目嘅高位壓逼進攻足球，傳媒稱佢呢種踢法為沙利主義（Sarrismo）或沙利球（Sarri-ball），淨係聽個名都覺得好堅啦！
所謂「沙利球」即係「垂直版tiki taka」，有人認為畀曼城主帥哥迪奧拿成名絕技tiki taka更有威脅同直接，速度更快，唔會成日橫傳拖慢晒啲時間，車路士喺三場季前熱身賽中，雖然只係入得3球及取得1勝2和成績，但整體表現其實唔差，尤其係年僅18歲嘅新星赫臣奧杜爾相當搶鏡，加上沙利搵咗熟悉呢個戰術體系，身價達5,700萬鎊嘅派牌人佐真奴費路加盟，相信有助球隊適應此新踢法。
曼城季前備戰未ready
另一邊廂曼城整個季前備戰好似完全未ready咁，可能係同陣中太多球員（16位）出戰世界盃有關，所以之前幾場熱身賽都派出大量後備同新人，雖然車仔預計亦冇夏薩特、泰拔高圖爾斯及尼高路簡迪，惟佢哋3場熱身賽陣容出奇地穩定，中前場6個位置從冇變過，睇嚟沙利已搵到破敵之計。
