話咁快新一季英超又開咧，Big 6球隊有啲不惜一擲千金，有啲閂晒水喉冇交易，由於英超轉會窗啱啱先閂窗，到底係好係壞，亦不宜咁早妄下定論。買得到亦未必好，買唔到留住彈藥都未必係壞事，需要因應球隊本身財政同實力方面而衡量。
曼城夠穩陣 阿仙奴要等候
先講講曼聯，佢哋今夏想作出嘅重要收購都唔成功，例如買中堅就處處碰壁，但正好畀主帥莫連奴一個考驗，畢竟過去兩季「紅魔」使錢唔少，今季高層決定慳啲，睇吓「寸王」可否騷騷真功夫。相反死敵利物浦就狂燒錢，除咗有法賓奴泰華利斯、梳頓沙基利等相繼來投外，亦以門將第2高轉會費簽入巴西鋼門艾利臣比加，決心根治佢哋嘅「阿基里斯腱」（意指弱點），無論係卡利奧斯定米洛列特，兩名門將都經常犯下大錯，相信艾利臣比加可令紅軍再無後顧之憂。
上季橫掃英超嘅盟主曼城，保留舊有班底之餘，兼且羅致埋好波之人馬列斯，稱得上平平穩穩，希望延續呢股霸氣。
至於倫敦3雄方面，儘管熱刺冇買人，但都留得住哈利卡尼等主力，一來佢哋高層向來搵錢大過天，二來變動小分分鐘係優勢；阿仙奴就有雲格離任，新帥艾美利建立新班底，睇嚟需要時間適應；車仔同樣易帥，沙利接手後放走有料門將兼世盃金手套得主泰拔高圖爾斯，以天價搵嚟有待考驗嘅西班牙門神阿列沙巴拿加，雖然未必係沙利意願，但我對呢單交易就唔太睇好喇。
