新帥沙利誓省招牌
新人事、新作風嘅車路士，喺今晚英超亮相作客哈特斯菲爾德。雖然「藍戰車」上周失落社區盾，但佢哋近日積極增兵，包括以天價上「車」榮升標王嘅西班牙門神阿列沙巴拿加，況且「新車長」沙利一向要求高，一眾「車手」為免以後冇好日子過，開鑼戰必定砌到盡，送份靚靚見面禮畀呢位煙剷主帥，造訪遇強即屈嘅哈特斯，車仔讓半一照捧1.7倍上盤！
（Now 621周六晚10時直播）
重金簽標王阿布仲肯玩
如果有睇上周嘅社區盾，車仔輸0比2畀曼城被技術性擊倒，踢落冇厘神氣咁，門神泰拔高圖爾斯又有離心，車路士終於喺今周把心一橫，將佢賣畀皇家馬德里，並以破門將轉會費紀錄嘅7,200萬鎊，從畢爾包簽入西班牙門將阿列沙巴拿加，亦令呢位23歲嘅「狂牛」第二把交椅，榮升今夏英超標王，再借入皇馬克羅地亞中場高華錫，除增加內部良性競爭激起原有球員嘅鬥心，背後仲有個深層意義，就係班主阿布拉莫域仲肯揼水搞隊波，並唔係由得隊波「自生自滅」。
雖然車路士夏薩特、基奧特及尼高路簡迪等世盃國腳今周悉數歸隊，亦喺周中國冠盃對里昂都有上陣，但預計佢哋今仗未必會擔正，正好畀巴克里同另一新兵佐真奴費路表演機會，演出經常畀球迷恥笑嘅箭頭艾華路莫拉達亦想一洗頹風。新帥沙利崇尚壓迫打法，要求球員要喺前場不斷跑動做逼搶，令對手犯錯而打快速反擊，上周社區盾輸得肉酸，今晚英超首騷，更加唔衰得，眾將一定識做。
哈特斯菲爾德主場遇強即屈
上季護級成功嘅哈特斯菲爾德，今夏冇乜點增兵，較受注目只係簽入摩納哥前鋒迪亞卡拜同買斷上季借將干高路，但同時放走中場湯馬士恩斯，實力隨時倒退。除此之外，哈軍每逢對親強隊都變軟腳蟹，上季6次喺主場面對Big 6強豪就輸足5場，縱有主場之利亦難擋車仔響頭炮，客軍讓半一照捧上盤。
