明恰烏圭轉身慢
世界盃8強今晚正式開打，頭場先有南美洲勁旅烏拉圭硬撼「高盧雄雞」法國。烏拉圭今屆雖然4戰全勝，可惜今場讓車馬，一對正選前鋒卡雲尼及蘇亞雷斯都有傷，上陣成疑，勢必打亂球隊部署；法國上仗淘汰阿根廷充滿說服力，光芒四射嘅基利安麥巴比面對轉身較慢嘅烏拉圭後防，隨時又有搵食機會，法國讓半一波童捧上盤。
(ViuTV 99、Now 616及618周五晚10時直播)
烏拉圭今屆分組賽被編入實力唔強嘅A組，基本上考驗不大，首名出線只係份內事，去到16強面對有C朗拿度壓陣嘅葡萄牙，球隊重現勁旅本色，憑卡雲尼梅開二度以2比1淘汰對手，可惜呢名PSG射手喺比賽末段傷出，連續幾日都冇操練，今仗9成9缺陣；另一王牌蘇亞雷斯喺日前操練亦疑似受傷，需即時停止練習，就算趕及復出，亦恐怕要紮住上陣。烏拉圭本身守強於攻，前線主要靠兩人打突擊食胡，上場對葡萄牙先開紀錄嘅一個就係最佳例子，如果今場缺少任何一個，反擊力肯定打折扣，一旦長時間畀對手圍攻，隨時久守必失，形勢唔樂觀。
高甸基文尼斯隨時出醜
法國今屆平均年齡只有26歲，上場16強面對平均年齡達29.3歲嘅阿根廷，可以講係予取予攜，其中基利安麥巴比個人梅開二度兼博得1個12碼，鋒芒掩蓋晒基沙文、保羅普巴等大師兄。雖然烏拉圭平均年齡較阿根廷後生1年多啲，但中堅高甸、荷西基文尼斯及右閘馬田卡沙利斯都係轉身較慢嘅球員，麥巴比絕對可以「屈速」，令呢條後防線出醜。
法國今屆分組賽表現唔算標青，但狀態一場比一場好，經過上場由領先變落後、然後再反勝對手晉級，心態上亦準備就緒，唔怕應付逆境波，面對陣容不整嘅烏拉圭，有力90分鐘內解決對手，法國讓半一上盤博得過。
