比利時3後衞騰騰震
周六凌晨世盃8強大戰，巴西將會喺喀山球場同比利時一決高下。16強驚險晉級嘅比利時，後防漏洞百出，呢場面對進攻實力更強嘅森巴軍團，隨時難以招架，加上歐洲紅魔近屆世盃淘汰賽對親南美球隊都冇着數，呢場真係冇乜勝算，寧願捧主勝好過。
（Now 616及618周六凌晨2時直播）
經歷上屆世盃1比7慘敗德國嘅恥辱之後，今屆捲土重來嘅巴西肯定吸取咗唔少教訓，而領隊迪迪亦深知攻守平衡喺世盃大賽嘅重要性，除咗揾嚟一班踢法夠硬淨，兼擅長防守嘅中場入大軍為防線做屏障之外，以堤亞高施華同祖奧米蘭達為首嘅後防組織都夠晒穩陣，今屆世盃踢咗4場只失過1球，嚟緊就算有正選防中卡斯米路停賽，都仲有曼城大將費蘭甸奴頂替，可見森巴軍團板櫈深度驚人。況且不嬲嗜攻嘅巴西，有尼馬同菲臘比古天奴等進攻天才喺前場發揮，入波根本冇難度。
比利時淘汰賽怕南美兵
眾所周知，「歐洲紅魔」陣中人才濟濟，除了有兩位中場大將夏薩特同奇雲迪布尼壓陣之外，仲有強力前鋒盧卡古喺前場揾食，不過上仗面對日本，佢哋優勢唔算明顯，以3後衞陣式迎戰個人能力唔算標青嘅日本，竟然2次被對手偷襲得手，雖然最後驚險反勝3比2，不過領隊馬天尼斯嘅戰術備受質疑。呢場如果佢哋唔能夠對陣容作出有效調整，面對實力更超班嘅巴西，防線隨時崩潰。值得留意嘅係，比利時過去3次世盃淘汰賽面對南美球隊全部輸晒，往績毫無優勢可言，呢次再喺淘汰賽遇上實力強勁嘅巴西，比利時都係凶多吉少，捧主勝。
