天時夾地利連環創奇迹
今晚世盃8強壓軸戰東道主俄羅斯鬥克羅地亞。睇番由申辦過程開始，俄羅斯已突破一個個不可能，其努力同決心堅係大，淘汰賽展開至今下盤當道，今場樂比支持1.64倍俄羅斯讓球主勝！
（Now 616及618周日凌晨2時直播）
俄羅斯嘅世盃奇迹其實由8年前開始，當時英格蘭被視為主辦大熱，但卻喺首圈離奇出局，即使事後有唔少國際足協高層貪污醜聞傳出，依然無損俄羅斯主辦嘅結果。之後抽籤俄羅斯分組賽對手只係烏拉圭、埃及同沙特阿拉伯，揭幕戰更對住最易食嘅沙特，接連安排莫非真係好運咁簡單？
今屆世盃被視為最政治化嘅一屆，尤其係俄國總統普京最近支持度跌至64％，只係世盃期間當地禁止示威粉飾太平，好多評論都指普京希望藉國家隊成績挽回聲望。事實上東道主除天時地利外，人和亦相當重要，例如賽會球證偏袒時有發生，最經典莫過於2002年東道主南韓爭議聲中躋身4強，今屆俄羅斯亦可謂順風順水，無論你係咪陰謀論者，都應相信呢股力量唔簡單。
戰術多變查帥抵讚
俄羅斯球員今屆非常賣力，分組賽球員跑動距離達115公里，遠高於平均水平106公里，外界評論甚至認為俄羅斯球員應接受更多禁藥測試，但國際足協拒絕公開佢哋嘅禁藥測試資料，究竟呢樣嘢同俄軍今屆成績有冇關？只能講句耐人尋味。
撇除場外因素，今屆俄羅斯戰術確實多變，對沙特阿拉伯踢4231狂攻對手；對西班牙則踢3中堅集中防守，每場陣式同正選名單都有調整，例如名氣大而狀態差嘅史莫洛夫首戰冇料到即要坐冷櫈，反映出領隊查切索夫的確係下過一番苦功。
克羅地亞分組賽表現甚佳，令球迷對佢哋充滿期望。克羅地亞確實有唔少頂級球員如莫迪歷、拿傑迪錫甚至列比錫等，但當一隊半冷門開始受追捧甚至孭飛絕非好事，今屆世盃8場16強賽事僅得2場開上盤，可見各隊實力相當接近，以俄羅斯目前氣勢有得受讓，實在不容錯過。
