世盃今日休戰，不過仲有1場瑞典超及1場挪超上演，阿King推介條2串1過關畀大家，分別係哈馬比主場對奧斯達辛斯嘅入球細，同埋史卓加斯特對基斯迪辛德嘅讓球主勝，乘埋超過4倍博得過。
先講瑞典超哈馬比主場鬥奧斯達辛斯，原本排第2嘅AIK蘇納前晚作客大勝特利堡4比1，哈馬比以1分之微跌落積分榜第2位，不過佢哋踢少2場，只要今場贏波便可重返榜首。
不過，哈馬比近況麻麻，聯賽小休前2場僅得1和1負，今仗主場出擊冇必勝把握，何況陣中首席射手、今季聯賽攻入7球嘅柏迪巴日前落實轉投中甲球隊FC深圳，面對聯賽3連勝及近況唔錯嘅奧斯達辛斯，料會陷於苦戰，今場捧細盤划算。
史卓加斯特「讓主」好路
另一場挪超，史卓加斯特主場鬥基斯迪辛德，史卓加斯特聯賽連盃賽主場累積3連勝，加埋入7球冇失過波，攻守非常對辦；相反，基斯迪辛德近4仗作客輸咗3場，其中挪威盃更淨吞低組別球隊賀特兩蛋，表現靠唔住。
睇番兩軍對上3次交手，都係由主場一方勝出，而且勝方全部唔止贏1球，既然今日賽事唔多，主Ｗ略嫌偏熱，想有較高回報，可揀史卓加斯特有2.37倍嘅讓球主勝。
