高盧雞3基Vs紅魔3叉戟
世盃進入真正戲肉，今晚率先上演首場4強大戰，由「高盧雞」法國硬撼「歐洲紅魔」比利時。法國靠高大中鋒基奧特做支點，掩護基沙文及基利安麥巴比後上入楔嘅「3基」鋒線，火力強勁，但「歐洲紅魔」戰術主動進取、攻強守弱，自從將奇雲迪布尼推前一格，與盧卡古及夏薩特組成3叉戟後，比利時鋒力更加大爆發，淘汰森巴兵團充滿說服力，雙方為爭入決賽唔會再有保留，首選2.5球嘅入球大。
（ViuTV 99台、Now 616及618周三凌晨2時直播）
兩軍防線都唔穩陣
經過分組賽寓賽於操，法國踏入淘汰賽即見真章，先喺16強以4比3擊敗阿根廷，上仗再以2比0輕取另一支南美勁旅烏拉圭，表現相當出色。法國主帥迪甘斯對「3基」鋒線信任有加，讓箭頭基奧特做開路先鋒，為拍檔基沙文及基利安麥巴比製造射門空位，基沙文與麥巴比於今屆各入3球，特別係基利安麥巴比嘅高速突破，往往令對手後防疲於奔命，不過法國今屆後防演出唔算太穩陣，16強對阿根廷便試過單場失3球，上仗8強能保清白身，全因烏拉圭打穩守突擊，冇咗卡雲尼效率大減，今次對手換上火力強勁嘅比利時，後防失波唔出奇。
比利時變招瓣數多
另一邊廂，比利時主帥馬天尼斯一向主張進攻足球，而且變招瓣數多，例如16強對日本落後2球嘅時候，及時將盧卡古與隊長夏薩特拉邊，引走敵方中堅，讓原本司職中場嘅奇雲迪布尼，可於中路自由上落，全面釋放佢嘅埋門及遠射能力，最終驚險反勝3比2；上仗對8強就改用費蘭尼及韋素做雙防中，再用高空轟炸，成功以2比1淘汰大熱門巴西，盡顯強大鋒力。比利時係今屆目前為止唯一5戰全勝球隊，而且加埋轟入14球，攻擊力係4強之冠。
只不過，比利時與法國面對同樣問題，中堅高柏尼剛傷愈狀態一般，右閘梅尼亞今仗停賽，上仗代替恩歷克卡拉斯高出任左翼衞嘅查迪尼有傷，今仗上陣成疑，令防線充滿隱憂。既然今場兩隊主角都係攻強守弱，今仗屬鬥攻格局，2.5球大盤捧得過。
