老將玩拉布Vs謹慎唔亂搏
周四凌晨世盃4強大戰，克羅地亞將會喺莫斯科路斯尼基球場，同英格蘭爭奪決賽席位。老將當家嘅「格仔軍團」，連續2場淘汰賽都要踢到互射12碼先分到勝負，體力消耗大冇咁快回到氣，呢場隨時拉住布踢，另外英格蘭主打穩守突擊，為爭取52年嚟再次殺入決賽，呢場都唔敢冒進，寧願捧半場和好過。
（ViuTV 99台、Now 616及618周四凌晨2時直播）
有莫迪歷同拿傑迪錫呢兩位頂級中場壓陣嘅克羅地亞，中場線堪稱係豪華級別，今屆佢地就多次展示出色嘅個人能力，喺攻守兩方都成為「格仔軍團」嘅絕對核心，過去兩場淘汰賽面對丹麥同俄羅斯，兩人都同對手鬥足120分鐘，可見領隊達歷十分倚重呢兩位分別喺皇家馬德里同巴塞隆拿兩支西甲頂級球隊效力嘅中場。不過大家睇過克羅地亞正選陣容，都知佢哋年紀都唔細，包括兩位正選中場在內，同埋前場攻擊手文迪蘇傑等，都年逾30歲，加上上仗除咗門將蘇巴錫大腿整親捱到完場、右閘維沙積高亦因傷被換出，兩人上陣成疑，可見球隊經歷連場激戰，體能負荷極重，呢場明知體力輸蝕，寧願大打控球戰術，拉住布同英格蘭踢。
英格蘭等足52年拒冒險
今屆英格蘭雖然星味欠奉，不過勝在球隊平均年齡唔大，喺領隊修夫基帶領下穩打穩紮，表現成熟，成功繼1990年之後，再次殺入世盃四強，引領英式青春風暴席捲俄羅斯。以穩守戰術為先嘅英格蘭，3人防線夠穩陣，尤其門將比克福特過去兩仗淘汰賽交出各種神救，演出令人眼前一亮。英格蘭對上一次入到世盃決賽，已經係1966年，呢次再有機會創出佳績，班波肯定唔敢輕舉妄動，「三獅軍團」放下以往強隊身段，面對實力強勁，兼近4仗都同對手半場打和嘅克羅地亞，隨時再縮後打反擊，雙方開局都求穩嘅情況下，半場和絕對捧得過。
