季軍Show金靴大戰
今晚世盃季軍戰，兩支4強輸波球隊比利時同英格蘭，將會繼小組賽之後再次碰頭。呢場除咗係第3名之爭，仲係兩位9號仔前鋒哈利卡尼同盧卡古爭奪今屆神射手嘅關鍵一戰，兩人無緣爭冠心都碎晒，為贏得呢項殊榮，進攻意欲肯定強，加上過去世盃季軍戰不嬲多波入，呢場捧中位數2.5球入球大冇走雞。
（Now 616及618周六晚10時直播）
大打進攻足球嘅「歐洲紅魔」比利時，絕對係今屆32強分子之中，踢法最具娛樂性嘅一隊。佢哋喺16強面對日本落後兩球，最終上演熱血反擊，連追3球反勝3比2，跟住再喺8強以2比1擊敗傳統勁旅巴西，可惜4強受制於法國銅牆鐵壁，最終輸0比1要轉戰季軍戰。
盧卡古射手榜喪追哈神
比利時今屆決賽周至今6場轟入14球，火力強勁，奇雲迪布尼、夏薩特及盧卡古等一班進攻天才，個個都有進帳，尤其箭頭人物盧卡古，無論拉邊或者喺中路強行突破，威力都十分驚人，至今個人已經斬獲4球，只落後帶頭嘅「哈神」哈利卡尼2粒，呢場絕對仲有得追，為攞神射手肯定搏命。
另一邊廂，以年輕球員為骨幹嘅「三獅兵團」英格蘭，上仗4強領先克羅地亞後，一班小將明顯怯場，未能擴大優勢之餘，仲畀對手反勝，最終同決賽擦身而過實在可惜。不過英格蘭前場進攻好手，包括史達寧同連格，質素絕對唔差，上仗多次畀到對方後防威脅，去到季軍戰無咗心理包袱，相信可以交出最佳表現，全力支援至今已經射入6球嘅哈利卡尼，鞏固佢嘅神射手優勢。
值得留意，「三獅兵團」中場佐敦軒達臣、後衞捷比亞同基爾獲加都有傷，冇咗呢幾位中後場主力，英格蘭防守有隱憂，失波唔奇。況且歷來世盃季軍戰經常上演入球騷，自1978年，近10屆季軍戰全開3球或以上，呢場有兩大射手力爭世盃神射手，入波肯定唔會少，中位數2.5球入球大係心水之選。
